Festa - miðstöð um samfélagsábyrgð Festa - miðstöð um samfélagsábyrgð

Fræðsludagskrá um ábyrga ferðaþjónustu

Fyrirtækjum sem vilja setja sér markmið um ábyrga ferðaþjónustu býðst að skrá sig í fræðsludagskrá.

Kynningarfundur 16.12.2016 – Grand Hótel Reykjavík
Vel var mætt á kynningarfund um „Ábyrga Ferðaþjónustu“ sem haldinn var á Grand Hótel Reykjavík – í glæsilegum endurbættum sal þeirra Hvammi.
– Kynning á verkefninu: Ketill Berg Magnússon (sjá glærur hér)
– Samfélagsábyrgð Farfugla: Helena W. Óladóttir, gæða- og umhverfisstjóri Farfugla / HI Iceland (sjá glærur hér)
– Fundarstjóri: Ásta Kristín Sigurjónsdóttir, klasastjóri Íslenska Ferðaklasans

Inngangur
Til að styðja við fyrirtæki sem skrifa undir yfirlýsingu um ábyrga ferðaþjónustu, bjóða Festa – miðstöð um samfélagsábyrgð og Íslenski ferðaklasinn uppá fræðsludagskrá sem fyrirtækjum býðst að taka þátt í á kostnaðarverði. Um er að ræða átta hagnýta fræðsluviðburði þar sem áherslan er á að auðvelda fyrirtækjum að setja sér markviss og mælanleg markmið í samræmi við ábyrga ferðaþjónustu.

Markmið
Með fræðsludagskránni er markmiðið að fyrirtækjum bjóðist á aðgengilegan máta þjálfun til að setja sér markmið um sjálfbærni og samfélagsábyrgð í samræmi við verkefnið Ábyrg ferðaþjónusta..

Lýsing
Fræðsludagskráin felst í átta fræðsluviðburðum á árinu 2017. Þar verður ýmist boðið uppá vinnustofur, fyrirlestra eða hugmyndafundi. Að minnsta kosti helmingur fræðsluviðburðanna verða í fjarfundarformi svo fyrirtæki geti tekið þátt óháð staðsetningu.

Dagskrá
10.jan 2017 – Undirskriftarfundur um Ábyrga ferðaþjónustu í Háskólanum í Reykjavík – sjá frétt og myndir hér.

Grunnurinn: Ábyrg ferðaþjónusta, samfélagsábyrgð, markmiðasetning
20. janúar 13.00 – 15.00 – Byrjunarvinnustofa – staðsetning Háskólinn í Reykjavík
Í þessari vinnustofu fá þátttakendur heildarmyndina. Kynnast hugtökunum sjálfbærni og samfélagsábyrgð, auk þess að fá hagnýt dæmi um markmið sem hægt er að setja fyrirtækjum um alla fjóra þætti yfirlýsingarinnar um Ábyrga ferðaþjónustu.

—-

Öryggi ferðamanna
9. febrúar kl. 9.00-11.00 – Fjarvinnustofa  og staðarfundur í Háskólanum í Reykjavík
Þema vinnustofu: “Tryggja öryggi gesta okkar og koma fram við þá af háttvísi”. Þátttakendur kynnast hvað felst í markvissu öryggisstarfi ferðaþjónustufyrirtækja og hvernig setja má upp öryggisáætlun fyrir gesti.

Markmið vinnustofu er að þátttakendur:
– öðlast þekkingu um helstu þætti ábyrgrar ferðahegðunar, um hagnýt ráð fyrir öryggismál fyrirtækja og um gerð öryggisáætlana.
– fái leiðsögn um hvernig greina megi mikilvægustu öryggisáskoranir síns fyrirtækis.
– geti sett fram áætlun um hvernig markmið um öryggismál fyrirtækisins verða sett fram, árangur mældur og niðurstöður birtar.

Dagskrá frá kl 9.00 – 11.00
– Íslandsstofa: Ábyrg ferðahegðun
– SafeTravel: Hagnýt ráð um öryggismál fyrirtækja
– Ferðamálastofa og Vakinn: Gerð öryggisáætlana
– Raundæmi frá fyrirtæki – hvernig við skipuleggjum öryggismál hjá okkur.

Skráning hér

—-

Mannauðurinn mikilvægi – þjálfun og réttindi starfsmanna
7. mars kl. 14.00 – 16.00 – Fjarvinnustofa
Þema vinnustofu: “Virða réttindi starfsfólks”. Farið yfir grunnatriði kjarasamninga, t.d. fyrir starfsfólk í vaktavinnu, lærlinga og sjálfboðaliða. Mikilvægi framsýnnar mannauðsstjórnunar og markvissrar þjálfunar starfsfólks. Hagnýt ráð fyrir ferðaþjónustufyrirtæki sem vilja setja sér mannauðsmarkmið sem hjálpar þeim að virða réttindi og fá gott starfsfólk. 

—-

Tækifæri skapast með sjálfbærni í ferðaþjónustu
Dagskrá í tengslum við aðalfund SAF – 16.-17. Mars

—-

Að hafa jákvæð áhrif á nærumhverfið
14. september kl. 9.00 – 11.00 – Fjarvinnustofa
Þema vinnustofu: “Hafa jákvæð áhrif á nærsamfélagið”. Þátttakendur greina tækifæri til að rekstur þeirra geti skilað ávinningi fyrir þau samfélög þar sem þau starfa í. Farið yfir hvernig lágmarka megi neikvæð áhrif og vinna með samfélögum þannig að samfélagslegar áskoranir verðir leystar. Dæmi um samfélagsþátttöku fyrirtækja kynnt og mælanleg markmið rædd.

—-

Umhverfisstefna – frá orðum til efnda
19. október kl. 9.00 – 11.00 – Fjarvinnustofa
Þema vinnustofu: “Ganga vel um og virða náttúruna”. Þátttakendur fá hagnýta þjálfun í að setja sér stefnu um umhverfismál sem hentar þeirra starfsemi. Kynntar verða aðferðir til að greina helstu áskoranir, setja mælanleg markmið og raunhæfar framkvæmdaáætlanir um umhverfismál.  (ATH aðkomu Landverndar, Umhverfisstofnunnar?)

—-

Hugmyndafundur – þátttakendur bera saman bækur sína og læra hver af öðrum
16. nóvember   kl. 9.00 – 11.00 – Fjarvinnustofa
Á þessum fundi ræða þátttakendur hvernig markmiðasetningunni miðar. Nefna dæmi um það sem vel gengur og bera upp áskoranir svo hægt sé að læra hver af öðrum. Fundurinn er undirbúningur fyrir lokafundinn í desember þar sem nokkur fyrirtæki munu kynna sín markmið.

—-

Uppskeruhátíð Ábyrgrar ferðaþjónustu
14. des kl. 14.30 – 16.00 – staðsetning auglýst síðar
Á þessum fundi munu nokkur fyrirtæki sem tóku þátt í Ábyrgri ferðaþjónustu segja frá markmiðum sínum og reynslunni af því að taka þátt í verkefninu.

Aukafundir
Fyrir utan þessa skipulögðu fræðsludagskrá verða haldnir hugmynda- og/eða umræðufundir er þörf þykir. Auk þess fá þátttakendur send út fréttabréf með ábendingum og aðgang að glærum og efni fræðsluviðburðanna.

Umsjón
Ketill Berg Magnússon, Festu og Ásta Kristín Sigurjónsdóttir, Íslenska ferðaklasanum

Verð
Fyrirtækjum sem undirritað hafa yfirlýsinguna um Ábyrga ferðaþjónustu býðst að skrá starfsfólk sitt í fræðsludagskrá á kostnaðarverði. Í boði eru rafræn “aðgangskort” sem gilda sem eitt sæti á alla átta viðburðina. Upplagt er að fela ákveðnum starfsmanni ábyrgð á að halda utan um verkefnið fyrir hönd fyrirtækisins. Starfsmenn eins fyrirtækis geta skipst á að mæta á fræðsluviðburðina eða fyrirtækið keypt aðgangskort fyrir alla starfsmenn sína sem koma að verkefninu.

 Verð pr. Aðgangskort er kr. 45.000 og kr. 24.000 fyrir aðildarfélög Festu og Íslenska Ferðaklasans.

Skráning í fræðsludagskrá

Hópur nemenda í MPM námi við Háskólann í Reykjavík útbjó verkfærakistu sem gagnast ætti þátttakendum í átaksverkefni Festu og Íslenska ferðaklasans um ábyrga ferðaþjónustu. Verkfærakistan samanstendur af nokkrum tólum. Fyrst ber að nefna greiningartæki sem gagnast fyrirtækjum til að sjá stöðu sína í flokkunum fjórum (umgengni um náttúruna, öryggi starfsmanna, neytendavernd og áhrif á nærsamfélagið). Einnig eru leiðbeiningar um almenna markmiðasetningu ásamt sniðmáti til að nota við markmiðasetninguna sjálfa.